A Carreira da Diversidade de Ambar regresa ás rúas de Ribeira este domingo a partir das dez da mañá na súa novena edición. O evento foi presentado polo alcalde en funcións Manuel Ruiz, xunto coa presidenta da Asociación Ambar, Milagros Rey; Joserra Figueira, responsable da área de deportes da entidade; un estreito colaborador como é Abraham Benítez; e dous integrantes do seu equipo de atletismo, Marina e Javi.
A cita sairá ás 10 horas da explanada de Coroso e, ademais da versión absoluta e da inclusiva sobre un circuíto de 5 kilómetros e das distancias máis curtas para as categorías infantís, como novidade caberá tamén, anunciou Milagros Rey, a posibilidade de percorrer unha andaina de 3,3 kilómetros, con ou sen mascota.
O peche de inscricións terá lugar mañá xoves á medianoite (pódese facer na web cronotec.es). Os comparecentes na presentación de hoxe fixeron un chamamento a que a xente se inscriba na certeza de que a proba “está moi ben para facer marca”, en palabras de Abraham Benítez, quen animou especialmente aos corredores de Ribeira a que aproveiten estas últimas horas para anotarse.
Dorsal cero
Joserra Filgueira recordou que tamén existe a opción do ‘dorsal cero’ para todos aqueles que non podendo participar si queren colaborar con esta iniciativa solidaria. Neste senso, informou de que o recadado irá destinado á obtención de material deportivo para as actividades que se realizan no centro da asociación.
Manuel Ruiz loou o labor que realiza a asociación Ambar, agradeceu a implicación dos seus colaboradores e destacou as cualidades desta carreira, que non só inciden nun obxectivo importantísimo como é promover a diversidade, senón que tamén teñen un compoñente solidario ao axudar a Ambar nas súas actividades.
Ademais, o rexedor municipal, que xa se inscribiu na cita deportiva, significou que coa introdución da modalidade da andaina “non hai escusa: o que non poida correr, pode andar”.
Marina e Javi, por último, aseguraron que lles encanta correr e adestrar e prometeron facer un bo papel na carreira.
