A Asociación de Empresarios de Ribeira compartiu unha carta aberta dirixida aos grupos políticos con representación en Ribeira, na que se lles achega o punto de vista da patronal (e a súa preocupación polo clima de incerteza xerado) acerca dos resultados das pasadas eleccións municipais deste domingo, nas que o Partido Popular foi a forza máis votada, con dez concelleiros, pero sen acadar a maioría absoluta, seguida do BNG (cinco actas), o PBBI (cinco actas) e o PSOE (unha acta).
Na súa carta os empresarios fan saber que “despois das últimas eleccións e como consecuencia dos resultados das mesmas, queremos facer chegar a todos e cada un dos políticos que alcanzaron representación para formar a xunta de Goberno do Concello, a nosa preocupación polo devir dos proxectos e retos pendentes de lograr e executar”.
E engaden: “Pedimos ao ou aos partidos que logren alcanzar a gobernabilidade no noso Concello, pensen e sexan fieis ao que prometeron nas súas campañas alcanzar o mellor para Ribeira”, é por iso que solicitamos que se deixen ao carón os egos persoais, así como os intereses de partido aparcados en aras dun logro común que é o ben de toda a cidadanía de Ribeira.
E proseguen: “Obras en proxecto como a nova sede dos nosos maiores, a tamén nova sede do Centro de Saúde, ou obras xa en marcha como a variante e o polígono industrial, así como outras que están por vir, non deben verse afectadas pola política de partidos e quedar relegadas, xogámonos o presente e o futuro das xeracións vindeiras”.
A carta, asinada polo presidente da patronal Francisco Martínez Gude, conclúe deste xeito: “Desde a nosa coñecida independencia política, solicitamos de todos que miren única e exclusivamente por Ribeira e as súas xentes”.
