A concellería de Cultura en funcións, María Sampedro, presentou na mañá deste 30 de xuño a programación da Fiestra da Cultura para este verán de 2023: unha proposta que engloba os distintos eventos da Concellería que dirixe para os meses de xullo, agosto e setembro. Desta volta, dixo, a axenda vén cunha trintena de espectáculos e actividades, gratuítas e abertas a toda a cidadanía. Para darlle forma contouse coa colaboración da Deputación da Coruña, a través da Rede Cultural, e da Xunta de Galicia a través de programas como Cultura no Camiño.
O programa desta edición deste ano reúne concertos, actuacións cómicas, novo circo, exposicións, cine ao aire libre, contacontos, maxia, danza contemporánea e un longo etcétera, que chegarán non só a Ribeira senón tamén, seguindo a liña marcada en anos anteriores, a distintos lugares das parroquias do municipio.
A axenda ábrese este sábado, día 1 de xullo, coa inauguración ao mediodía no Centro Cultural Lustres Rivas dunha exposición da artista ribeirense Carmen Sampedro. Trátase dunha mostra de pintura e poesía que estará aberta ao público ata finais de mes. Neste mesmo sábado día 1 tamén está programado o festival Tahume entre folclores, presentado hai uns días.
As seguintes accións, serán tres contadas para público adulto, enmarcadas no Festival Atlántica de Narración Oral, e que serán o día 2 de xullo (domingo) no Lavadoiro de Penisqueira (Aguiño), o xoves 6 de xullo no Miradoiro de Pedra da Ra, e o venres 7 de xullo no Piñeiral da Corna en Palmeira. As tres sesións serán ás nove da noite.
Tamén achegarase cinema ao aire libre, en modalidade autocine. A primeira sesión será o venres 7 de xullo no exterior do Centro Social de Oleiros coa película Space Jam. Nuevas Leyendas, e a esta proxección seguiranlle outras o 28 de xullo con Demonios de Barro en Olveira e o 11 de agosto coa premiada Unicorn Wars no aparcadoiro de punta do Castro en Castiñeiras.
O programa proseguirá con máis accións nas parroquias, pois os días 28 e 29 de xullo volverase contar co festival Mar aberto. Concertos na fin da terra da man da Xunta de Galicia, e que traerá as actuacións de Sheila Patricia, The Gift, Allova ou Blanca Paloma entre outros artistas. É unha proposta que “permitirá gozar da música e a cultura nun espazo emblemático como é o Faro de Corrubedo e que cada ano suma máis seguidores”, sinalou a concelleira, que quixo destacar tamén a posta en valor doutro recurso natural e cultural como é o Dolmen de Axeitos e por iso para o 12 de agosto preparouse no seu entorno un pequeno espectáculo de Iseo a Moura, titulado A Grandeza do pequeno e que está dirixido á poboación infanti.
As disciplinas de circo, acrobacias, maxia e música tamén terán o seu oco neste programa coas actuacións da compañía Sempre Arriba, o grupo de percusión Odaiko, a maxia e rock do Mago Teto, Inventi teatro ou Gazhafellos. Estas actuacións, dirixidas a todos os públicos, serán os sábados, ás dez e cuarto, no paseo do Malecón ou na praza de Porta do Sol, segundo as necesidades e características de cada unha delas, onde instalaranse como é habitual cadeiras para a comodidade dos asistentes.
Tamén en Ribeira, coincidindo coas datas das Festas de Verán, contarase con actuacións para público infantil e familiar na praza do Concello a mediodía con Migallas Teatro e Fantoches Baj, así como a actividade Cantando contando que achegará xogos de habilidade, inchábeis e festa da escuma. Ademais na praza de España poderase gozar do espectáculo de Milladoiro 40 anos dende Maeloc e na praza de Porta do Sol o Concello organizará a Mostra de Música e Danza Tradicional na que participarán distintas formacións do municipio e que terá como broche de ouro final a actuación da compañía de Fran Sieira co seu novo show Neutrx.
A axenda tamén inclúe outras propostas en colaboración tamén con distintos colectivos como a II Feira do Vinilo, a II edición do Festival Etal Equal, a celebración do Día de San Cristovo, a exposición da Fundación Igual Arte sobre as Illas Atlánticas, unha mostra colectiva que nos achegarán distintos artistas da Galería O Faiado, e tamén a exposición de Francisco Paz xa no mes de setembro.
Todo este programa poderase consultar no cadríptico da Fiestra da Cultura que editou a área de Cultura e que terá distribución nas oficinas de turismo, no Centro Cultural Lustres Rivas e noutros lugares e que tamén se publicará na web municipal (www.ribeira.gal) e nas redes sociais. Ademais poderase ir completando con outros eventos e espectáculos que se irán anunciando no seu momento.
