A licitación do contrato de Servizo de Axuda no Fogar (SAF) do Concello de Ribeira recibiu un total de nove de empresas segundo se desprendeu da apertura dos sobres por parte da mesa de contratación.
O Concello explica que o contrato ten un orzamento base de 1.696.620,64 euros, IVE incluído, e unha duración dun ano, que podería prorrogarse un ano máis.
De acordo co prego de condicións técnicas, este servizo “está aberto a todas as persoas ou unidades de convivencia domiciliadas no termo municipal de Ribeira para as que, de acordo coa valoración técnica correspondente e o procedemento establecido, supoña un recurso idóneo de atención”. De modo particular, o servizo atenderá “a persoas maiores con déficits de autonomía e a persoas con diversidade funcional”, especialmente cando carezan de apoio persoal na súa contorna inmediata, distinguíndose os seguintes tipos de acceso:
a) SAD Libre Concorrencia: Orientado a persoas que non teñan un dereito de atención recoñecido dentro do sistema de autonomía e atención á dependencia.
b) SAD dependencia. Atenderá a persoas en situación de dependencia que teñan resolución aprobatoria do programa individual de atención (PIA) no marco do Sistema de Autonomía e atención á Dependencia (SAAD).
c) SAD urxencia. Orientado a persoas con limitación de autonomía que requira unha intervención urxente polas súas circunstancias persoais e valorada esta circunstancia pola técnica/o responsable do programa de axuda a domicilio.
d) SAD socio familiar. Orientado a persoas que requiran apoio ás súas capacidades persoais para mellorar a dinámica familiar e a relación social mediante a adquisición e desenvolvemento de habilidades que preveñan ou modifiquen condutas e situacións de risco.
