O Concello de Ribeira formalizou ante notario a compra da nave que vai servir de sede ao Grupo de Emerxencias e Acción Municipal (GAEM) e de Protección Civil de Ribeira e que, conforme ao acordo plenario adoptado en febreiro do ano 2019, recibirá o nome do veciño de Carreira Manuel Dieste Mos, fundador da citada agrupación.
A compra tivo un importe de 210.000 euros e a nave en cuestión está situada en Cubelo, nunha finca de 2.462 metros cadrados situada nas inmediacións da escola infantil municipal e do colexio de Frións. O inmóbel conta cunha superficie de 533 metros cadrados, con alturas que oscilan entre 4,60 e 6,90 metros cadrados.
O Concello lembrou que xa dispón dun proxecto de acondicionamento que conta cun orzamento de execución material de 79.369 euros. De acordo con este documento, vaise remodelar o espazo para poder albergar unha zona de atención ao público (con recepción e un despacho), ademais de realizar distintas dependencias como vestiarios, zonas de descanso diúrno e nocturno, garaxe e almacén situado nun faiado aberto (entreplanta) para albergar produtos delicados ou fráxiles.
O prazo de execución son 4 meses.
Actualmente, GAEM e Protección Civil teñen as súas dependencias no andar soto da Casa Consistorial: un espazo que, a raíz das obras de reforma do edificio previstas e co-financiadas con fondos Next Generation, destinarase a ampliar as oficinas do persoal da administración centralizado na Casa do Concello e resolver as carencias existentes neste sentido.
