O alcalde de Boiro, José Ramón Romero, e outros membros da Corporación acompañaron este mércores 28 de xuño ao grupo de voluntariado Turbina nas actividades que programaron para celebrar o Día do Orgullo. A praza de Galicia acolleu durante a tarde obradoiros e actividades e ás 20.00 hora tivo lugar a lectura do manifesto.
Dende as 17.00 horas na Praza de Galicia realizáronse obradoiros de Tye -Dye, photocall e un mural de mensaxes no colgar as reivindicacións. Os rapaces e rapazas de Turbina foron os encargados de facer a lectura do manifesto no que afirmaron que “queda moito por facer, moitos dereitos por conquistar e moito odio e LGTBIfobia á que facer fronte”.
Na mesma liña o alcalde de Boiro pechou o acto falando dos moitos dereitos que se conquistaron e no que aínda queda por facer. “A sensibilización e educación en igualdade e dereitos debe traballarse dende as escolas e esa é a liña pola que queremos continuar dende o Concello, con programas cos que traballar cos nosos nenos e nenas”, afirmou José Ramón Romero.
A celebración do orgullo en Boiro rematou cunha festa de polvos Holi e a DJ Pájara Boba.
