A nosa comarca sumouse ás mostras de repulsa contra o feminicidio desta fin de semana pasada en Oia. Se hoxe pola mañá informabamos da mobilización da Asociación de Mulleres do Barbanza (Mulleres en Acción), que convocou unha nova concentración este luns 5 de xuño ás 20.30 horas na praza do Concello de Ribeira, cómpre lembrar tamén a mobilización fixada para as 20.00 horas en Rianxo, da man do grupo local da Marcha Mundial das Mulleres e o Concello. Será na praza de Padrón.
A listaxe de localidades nas que se organizan mobilizacións podemos vela na web www.feminismo.info.
Os feitos que se denuncian nesta nova concentración aconteceron esta fin de semana nun camping de Oia (Pontevedra), onde foi asasinada Ana Vanesa pola súa ex parella, que se suicidou dun disparo nun monte próximo ao lugar dos feitos. O home (un axente da Garda Civil) tiña orde de afastamento de 300 metros da vítima e prohibición de comunicarse con ela. O presunto autor do feminicidio suicidouse sobre as 22.15 horas deste sábado tras máis dunha hora na que os axentes tentaron dialogar con el para que se entregase.
