Esta finde (os días 16 e 17 de xuño) celebrouse en Ribeira un dos grandes eventos anuais do comercio local: a Noite Aberta, impulsada pola Asociación de Empresarios.
Participaron preto de medio cento de establecementos, que non pecharon até as 22.00 horas e que ofreceron importantes descontos e oportunidades aos seus clientes.
O evento incluíu tamén actividades para a rapazada, con xogos na rúa durante a tarde do sábado que incluíron inchábeis acuáticos e (a xeito de remate) unha gran festa da da escuma. Tamén houbo, igual que o ano pasado, un tobogán inchábel acuático na rúa de Lugo.
A organización (a patronal) quixo agradecer o apoio da cidadanía de Ribeira e dos establecementos implicados. “Estamos plenamente satisfeitos do desenvolvemento da xornada e foi unha alegría ver a praza do Concello chea de xente toda a tarde do sábado, co goce dos nenos e sen esquecer o obxectivo plenamente logrado de ver Ribeira ateigada de xente con motivo das diferentes actividades que con moito traballo e non menos ilusión levamos a cabo”, explicou o presidente da Asociación de Empresarios, Francisco Martínez Gude, quen tamén valorou positivamente a harmonía xerada entre a Noite Aberta e outra das grandes actividades anuais da patronal, que tamén se celebrou esta fin de semana: a Feira do Automóbil Eléctrico e Híbrido, na praza de España. “Estas iniciativas”, engadiu, “redundaron nun polo de atracción de xente que encheu as nosas rúas e comercios e que nos deron un novo empuxe para seguir traballando con vistas a que Ribeira sexa unha referencia comarcal”. O presidente tamén fixo un chamamento “a todos e cada un dos nosos asociados” para que se impliquen en “apoiar a realización de actividades que reportan un gran beneficio á economía do noso pobo”.
