A compañía Berrobambán iniciou en setembro, no concello de Mañón, a segunda temporada de Facer Memoria, un proxecto escénico e participativo que conta co apoio da Área de Cultura da Deputación da Coruña e que proseguiu a súa xira por Teo, Carballo e, a partir de novembro, tamén en Outes, poñendo o foco en Cando en San Lourenzo, coa participación activa do IES Poeta Añón. O obxectivo viña sendo “reunir á veciñanza e compartir historias e anécdotas para reconstruír a memoria local”. A iniciativa é conducida pola dramaturga e narradora oral Paula Carballeira baixo a dirección de Chiqui Pereira. Un dos seus obxectivos foi achegarse ao público en formato podcast, ou sexa, con feitura de arquivo sonoro dispoñíbel online. Dende o Concello de Outes lembran que xa se atopa dispoñíbel este ficheiro, e que tamén podemos acceder a estes contidos a través de Youtube.
O proxecto desenvolveu en Outes, ao longo dunha semana, un completo programa de accións e actividades que incluíu entrevistas individuais con veciños e veciñas que quixeran compartir as súas experiencias vitais, xuntanzas abertas nos centros sociais de cada parroquia, reunións con escolares que tiveran traballado na aula a recuperación da memoria local e, finalmente, un encontro-espectáculo no que participasen as persoas entrevistadas.
A novidade nesta segunda edición de Facer Memoria tivo que ver co son e a imaxe, xa que todas as entrevistas foron gravadas. Con este material, desenvolveuse a devandita peza sonora, en formato de podcast, na que se recollen algunhas das historias contadas pola veciñanza para ampliar a súa difusión. Ademais, artellouse unha peza audiovisual a xeito de resumo da actividade de Facer Memoria en cada un dos concellos.
