A Asociación de Empresarios de Ribeira prosegue este mes de xuño coas súas actividades de formación e divulgación destinadas a incrementar a competitividade, a transformación, a eficiencia e a rendibilidade das empresas locais, amais da súa capacidade para manter clientes e atraer outros novos.
Sen ir máis lonxe, o vindeiro mércores 28 de xuño está prevista a celebración da xornada 7 claves para conseguir clientes en pouco tempo. Será impartida polo experto Fernando Salinero, escritor, consultor de empresas e formador de directivos, empresarios e profesionais, amais de ser un referente no ámbito das conferencias motivadoras.
Celebrarase no local da Asociación de Empresarios (na rúa Rosalía de Castro) o mércores 28 a partir das 21.00 horas. Cómpre facer unha inscrición previa no teléfono 981 87 37 19. A actividade conta co apoio da Xunta de Galicia.
