O proxecto People & Planet: un destino común, cuxo obxectivo é concienciar á mocidade europea sobre as graves consecuencias do cambio climático para que se convertan en axentes de transformación na procura dun mundo máis sustentábel, vai facer unha parada os días vindeiros en Rianxo, concretamente o xoves 29 e venres 30 de xuño de 10.30 a 13.30 horas no Centro Social Liceo de Rianxo.
A iniciativa People & Planet, impulsada na nosa terra polo Fondo Galego de Cooperación, busca sensibilizar á xuventude local na necesidade de atopar hábitos e modos de produción que acheguen alternativas limpas, socialmente responsábeis e respectuosas co medio ambiente.
Unha das actividades abeiradas ao proxecto é Comunicación de Guerrilla, un obradoiro de 6 seis horas impartido por AGARESO que ten como obxectivo coñecer as técnicas da comunicación de guerrilla para deseñar e poñer en marcha unha “acción de rúa” que a través do enxeño e a creatividade, provoque unha reflexión na cidadanía. O tema proposto para reflexionar neste caso será a sustentabilidade vinculada coa auga e a auga como Dereito Humano fundamental.
En Rianxo celebrarase como dixemos o xoves 29 e venres 30 de xuño de 10.30 a 13.30 horas no Centro Social Liceo de Rianxo. Máis información en xuventude@concelloderianxo.gal.
