A Casa de Cultura Manuel Ayaso Dios (Aguiño) acolleu na noite deste 23 de maio un acto do Partido Popular coa veciñanza da parroquia. A cita contou coas intervencións do candidato á alcaldía de Ribeira, Manuel Ruiz, e de catro integrantes da súa lista en representación desta parroquia: Ana Barreiro, Rubén Lijó, Juana Brión e Manuel Reiriz.
Entre as propostas que o PP trae para “que Aguiño siga pola senda do crecemento” figuran xestionar coa Confraría de Pescadores e Mariscadores a creación dun espazo multiusos no edificio da antiga fábrica de xeo, así como abrir unha escola infantil municipal con 41 unidades tal e como negociou Ruiz Rivas coa Consellería de Política Social.
Rehabilitación do Conservatorio
Ademais, Manuel Ruiz recordou que as súas xestións propiciaron a consecución de máis de medio millón de euros de fondos europeos Next Generation para a rehabilitación integral do Conservatorio de Aguiño e que este martes á medianoite remataba o prazo de presentación de ofertas para a construción da nova Escola de Deportes Náuticos que dará sede ao Club de Remo.
Tamén enumerou outras agardadas actuacións como a creación de peiraos flotantes no porto, que está en fase de estudo na Xunta, ou mellorar a cuberta do Colexio Heroínas de Sálvora.
Outras propostas incluídas no programa electoral son a semaforización na estrada xeral de Castiñeiras, a creación dun monumento á Virxe do Carme na entrada marítima ao porto de acordo cos desexos da Confraría, a creación dunha ruta polas antigas fábricas de salga, ou a rexeneración e posta en valor do Porto Fenicio e a restauración do lavadoiro de Pinisqueira, accións que contan con financiamento europeo dentro do Plan de Sostibilidade Turística de Ribeira.
Tamén se pretende continuar urbanizando diferentes rúas (Celeiráns, Cobasa…) e mellorar a accesibilidade e o firme nas rúas Francisco Lorenzo e Sálvora, ou mellorar a pavimentación e ordenación do tráfico en Falcoeiro, Serriño e rúa do Porto, entre outras.
