O BNG deu por comezada a campaña electoral de cara ás eleccións municipais do vindeiro 28 de maio cun ateigado acto no Coliseo Noela na tarde do domingo 15 de maio. O candidato á alcaldía noiesa polos nacionalistas, Ricardo Suárez, solicitou o voto para o seu equipo porque “temos un proxecto claro para conseguir que Noia volva ser o municipio punteiro e vangardista que nunca debeu deixar de ser”. Ao respecto, sinalou que o concello noiés “ten o potencial, tanto humano como estratéxico, para reverter a actual situación de decadencia que a localidade está a padecer”.
Entre un extenso abano de propostas para transformar o municipio, “tanto a vila como os lugares e parroquias”, Suárez focalizou gran parte do seu discurso nos ámbitos do saneamento e do urbanismo. “Hai que acabar co desleixo no mantemento da rede de saneamento, abandonada desde que populares e independentes entraron no Goberno en 2016, con máis de 60 puntos de vertido incontrolado e máis da metade das augas residuais vertendo directamente sobre o medio”, afirmou. Neste sentido, o nacionalista resaltou “a importancia de licitar o mantemento da rede de saneamento”.
O candidato do BNG tivo unha mención especial para a controversia existente coas verteduras mineiras. “San Finx é a pinga que colma o vaso dos nosos problemas de saneamento. Poderiamos dicir que as dúas infraestruturas máis importantes para Noia, alén dos problemas de saneamento, non se atopan no noso municipio, senón en Lousame, é son as balsas mineiras e planta de vertidos contaminados de San Finx”, agregou Suárez, que botou en cara ao PP “a súa pasividade nesta cuestión”.
O urbanismo “para as persoas” ocupou un lugar central na aposta dos nacionalistas. “Queremos conectar de novo a Alameda e o Campo da Feira, dando prioridade ás persoas sobre os vehículos na estrada que as separa”, sinalou o candidato do BNG. “O maior problema da sociedade noiesa é a perda de xente nas rúas, e iso tan só se arranxa ofrecendo un espazo urbano de calidade”, sinalou Suárez. Neste sentido, dixo, “desenvolveremos unha reforma integral do paseo marítimo, dotándoo de vexetación, sombra e equipamentos para o lecer social”. E a medio prazo, agregou, “queremos conectar o paseo marítimo coa Alameda, facer chegar a Alameda ao mar”.
Previamente, a candidata número dous da candidatura do BNG, Mari Insua, resaltou a importancia de “levar esta Noia para as persoas tamén ás aldeas”. Ao respecto, Insua destacou que “Noia non é só a vila, as aldeas tamén existimos e tamén pagamos impostos, non nos chega cun lavado de cara cada catro anos, precisamos un Concello adaptado ás persoas e non ao revés”. Insua resaltou ao seu compañeiro Ricardo Suárez como “o alcalde que Noia merece, pois é unha persoa traballadora, incansable e que nunca descansa ata lograr os obxectivos que se marca”.
O mandatario de Rianxo, Adolfo Muíños, acompañou aos nacionalistas noieses na presentación da candidatura e mostrouse convencido de que “Noia volverá a ser unha referencia da man de Ricardo Suárez e o seu espléndido equipo”. Muíños resaltou a capacidade de xestión dos Gobernos municipais liderados polos nacionalistas. “O modelo BNG é un aval de proxectos innovadores e sensatos”, afirmou o rianxeiro.
