As persoas participantes no Obradoiro de Emprego Tahume VIII, co-impulsado polos Concellos de Porto do Son e Ribeira, mergulláronse os días pasados nas novas Tecnoloxías da Información e a Comunicación, o que se coñece como as TIC, ferramentas de gran utilidade para calquera actividade laboral. Os días pasados o alumnado regresou á Aula CeMIT de Ribeira para recibir os seus diplomas de aproveitamento tras a realización do módulo de Alfabetización Informática, impartido polo técnico da aula Manolo Bello.
Como dixemos, o Obradoiro de Emprego Tahume VIII é unha iniciativa conxunta dos Concellos de Porto do Son e Ribeira para incrementar a formación profesional da veciñanza e mellorar a súa empregabilidade. faino a través de formación especializada, avanzada e práctica, poñendo o foco na mocidade local. Un total de vinte alumnos e alumnas participan nesta convocatoria. Esta oitava edición é dual, xa que están a ser impartidas dúas especialidades distintas, por unha banda operacións básicas de cociña e pastelería e, pola outra, confección e montaxe de artes e aparellos.
