A Consellería do Mar, a través de Portos de Galicia, modificou a normativa de tramitación da celebración de eventos en terreo portuario para “contribuír á mellor organización destas actividades” e, tamén, “á compatibilidade entre elas así como coa propia actividade portuaria”.
Segundo avanza Mar, o texto inclúe “cambios puntuais” da normativa xa existente neste eido baseándose na experiencia acumulada desde a anterior modificación, que derivaba da entrada en vigor do catálogo de espectáculos públicos e actividades recreativas. O obxectivo é “ofrecer as maiores garantías para o público e a organización do evento así como a compatibilidade de actividades en solo portuario e a eficiencia na planificación dos distintos eventos”.
Entre estas modificacións, a normativa permite que nas zonas con menor actividade portuaria poidan instalarse carpas ou espazos a cuberto nunha superficie de máis de 100 metros cadrados (máximo fixado anteriormente) “se se trata de espectáculos ou actividades que teñan como singularidade o arraigo popular no ámbito territorial onde se desenvolven ou valor cultural”. O mesmo será de aplicación tamén para as festas declaradas de interese turístico de Galicia. Do mesmo xeito, a norma permite, de xeito excepcional, autorizar a conexión directa á liña eléctrica portuaria.
En paralelo á publicación da nova normativa, Portos de Galicia pon a disposición da cidadanía o novo formulario de solicitude de autorización de eventos e espectáculos públicos en terreos portuarios a través da páxina web do ente público: www.portosdegalicia.gal. Este formulario facilita e axiliza aos impulsores de eventos a tramitación necesaria para obter as correspondentes autorizacións.