A Xunta de Galicia emitiu un comunicado no que celebra a decisión da Comisión de Exteriores do Parlamento Europeo de catalogar as conservas de peixes e mariscos como “produtos sensíbeis” con vistas a protexelas nas negociacións que están a manter as autoridades comunitarias e Tailandia para pechar un acordo de libre comercio.
Esta medida adoptouse trala aprobación dunha das emendas presentadas polo eurodeputado galego Francisco Millán Mon ao informe que acompaña o acordo de asociación e cooperación entre a Unión Europea e Tailandia, en proceso de negociación neste momento.
No comunicado a Xunta expresa o seu desexo de que o Executivo comunitario e os estados membros tomen nota da votación da Comisión de Exteriores e “adopten as medidas oportunas para que o sector transformador de produtos do mar da comunidade non se vexa prexudicado por ese posíbel protocolo comercial”. E engade: “A apertura do mercado europeo ás conservas tailandesas libres de aranceis sería un duro golpe para as empresas galegas pois Tailandia é o primeiro produtor mundial e o seu principal competidor”.
O Executivo galego lembra que “os produtores de países asiáticos coma este non cumpren os estándares ambientais, laborais e hixiénico-sanitarios que se exixen en Europa, polo que o acceso libre das súas conservas ao mercado comunitario suporía unha desvantaxe competitiva para as empresas galegas”.
Por iso, a Xunta defende a necesidade “de que existan as mesmas regras de xogo para todos e rexeita un acordo de libre comercio que causaría un dano irreversíbel á industria transformadora de produtos do mar”.
Galicia aposta pola exclusión do atún do acordo de libre comercio e o establecemento de normas sólidas e equitativas que garantan a igualdade de condicións no resto de produtos pesqueiros.
Ante esta situación, a Xunta pedirá ao Goberno central que “interceda ante Bruxelas e defenda un sector que é referente no conxunto da Unión Europea, con estándares de calidade moi elevados, innovador e competitivo, tractor da economía de moitas localidades costeiras de Galicia, xerador de emprego, chave para garantir a soberanía alimentaria europea e resiliente, como demostrou nos momentos máis duros da pandemia pola COVID-19”.
