O Concello de Ribeira informou do inicio dos traballos previos ás obras de conexión coa aldea de Fafián, unhas tarefas que constitúen “o primeiro paso facer realidade a variante”, segundo explicou o Concello, engadindo que os traballos veñen da man da Xunta. En concreto, procedeuse ao replanteo na dita contorna así como colocación do cartel de obra correspondente a unha actuación que foi adxudicada á empresa Construcciones Ponciano Nieto S.L por un importe de 573.859 euros, IVE incluído.
O obxectivo da Xunta é que na primavera de 2024 os veciños dispoñan dun pequeno treito de 220 metros que forma parte da variante de Ribeira. Os traballos contan cun prazo de execución de 12 meses.
No que se refire ás características técnicas da nova vía, trátase dunha conexión entre a estrada provincial DP-7305, que conecta Ribeira con Aguiño a través de Carreira, e a aldea de Fafián.
A nova vía terá 220 metros de lonxitude, comezando na conexión coa estrada da deputación mediante a execución dunha glorieta de 34 metros de diámetro e finalizando en Fafián, cunha intersección en “T”.
Esta estrada de novo trazado disporá de 2 carrís de 3,5 metros de ancho e beirarrúas de 2,10 metros. As beirarrúas na marxe da estrada garantirán un itinerario peonil continuo e seguro para o tránsito dos veciños.
Como intervencións complementarias, procederase á reposición do firme dos viarios urbanos afectados; e á reposición dos camiños de servizo, executando dous pequenos treitos para garantir o acceso ás leiras.
O treito de 220 metros de nova vía “permitirá captar un tráfico estimado de case 4.300 vehículos, o 3,4% de vehículos pesados”, sinalou o Concello.
Variante de Ribeira
Esta actuación correspóndese coa parte inicial do 3º treito da Variante de Ribeira, cuxo proxecto de trazado completo aprobouse o pasado mes de agosto. Supón, desde xeito, o primeiro paso para facer realidade a Variante de Ribeira, que suporá un investimento autonómico conxunto por parte da Xunta de 10,3 M€.
