O Concello de Ribeira informa de que rematado o período de exposición pública, non se presentou ningunha alegación á memoria de municipalización do parking soterrado do Centenario, o que permite proseguir coa tramitación para que a xestión do estacionamento adquira carácter municipal.
O Concello lembra que conforme á citada memoria, dita xestión estará apoiada por unha empresa mediante un contrato de servizos de portería e mantemento, pois este sistema (explica o citado informe) ten a vantaxe “de que o Concello retén a capacidade de decisión sobre as instalacións, cunha maior flexibilidade de cara a futuros cambios do servizo en función da demanda dos cidadáns, sempre iso si, que se consiga dotar orzamentariamente as contías pertinentes para a dita xestión e sobre todo, para a execución das obras de rehabilitación no presuposto municipal”.
O próximo paso a dar será levar a pleno o regulamento de funcionamento do parking e a ordenanza fiscal pola que se regularán as tarifas.
