A compañía Al Grano presenta esta Semana Santa en Rianxo o seu último espectáculo, Kaldi. Será este mércores 05 de abril ás 19.30 horas na Sala Arcos Moldes do Auditorio Municipal.
Segundo informa a Área de Cultura de Rianxo a cita promete ser “unha experiencia única e emocionante para todos os amantes do café”, bebida á que se rende homenaxe cun espectáculo de acrobacias aéreas, música en vivo e efectos visuais impresionantes, onde os espectadores serán transportados a un mundo cheo de maxia e aventura.
Trátase dunha función destinada a tódolos públicos. A entrada será balde ata completar capacidade.
Ficha do espectáculo
Un curioso ser fala a través de acrobacias aéreas e movemento sobre o mundo do café. A súa rutina diaria parece que está a ser do mais normal, ata que o café empézalle a afectar. Vai pasando por diferentes estados, transformándose, cambiando a súa calidade de movemento e mesmo a súa personalidade. Un trapecio, unha mesa, unha cadeira e moito café. Sobre todo moito café.
