A Asociación de Empresarios de Ribeira vai activar este 25 de abril a súa Campaña do Día da Nai, edición 2023. O miolo da campaña é un sorteo dirixido a tódolos clientes que merquen e consuman nos establecementos asociados participantes. O obxectivo fundamental é incrementar as vendas e incentivar o consumo no pequeno comercio retallista e hostalería de Ribeira, segundo explicou a patronal.
A promoción realizarase entre as compras e consumicións feitas desde o día 25 de abril ó 7 de maio de 2023. A forma de participar será mercando e consumindo en calquera establecemento socio e subindo o tícket á web da asociación. Os sorteos realizaranse o luns 8 de maio ás 13:00h no local da Asociación de Empresarios.
Segundo informa a patronal, “nesta campaña poderán participar tódolos consumidores maiores de idade, que se rexistren a tal efecto e que realicen unha compra ou consumición por calquera importe nos establecementos participantes, sempre e cando a compra se realice durante as datas de duración da campaña.” Isto é, do 25 de abril ao 7 de maio de 2023.
Nas bases faise saber que “os consumidores participantes deberán en todo caso conservar o tícket da compra ou consumición realizada, a fin de dispoñer dun xustificante”.
A forma de participar será a seguinte: o consumidor/cliente poderá rexistrarse para participar nesta campaña na pestana Sorteos na web www.empresariosriveria.com efectuando o correspondente rexistro da compra ou consumición realizada, que lle dará dereito a unha participación no sorteo. No rexistro deberá quedar identificada a operación de compra/consumición realizada e o cliente ou consumidor. A realización dos sorteos será de xeito telemático mediante un código programado que
elixirá aleatoriamente aos agraciados de entre tódolos participantes, ata conseguir os gañadores do premio e un suplente para cada un.
O consumidor/cliente/usuario rexistrado na campaña poderá optar aos premios con varias participacións se é o caso, pero unha vez agraciado cun premio, xa non poderá optar a ningún máis na mesma edición.
Os premios destas campaña serán vales de compra por importe de 1.000€ menos a retención dos impostos obrigatorios, e o asesoramento dunha personal shopper que acompañará á persoa premiada no momento de realizar as compras do premio. Este ten que ser gastado un día en concreto a determinar entre a asociación e a/o premiada/o nos establecementos participantes nesta campaña, como data máxima o 31 de maio de 2023. O importe deste premio deberá ser gastado nos tres sectores que participan nesta campaña: comercio, hostalería e restauración.
Os outros premios da campaña son 20 entradas para unha sesión de masterclass de estilismo e cestas da compra valoradas en 50€ cada unha.
