O Concello de Ribeira, a través da concelleira de Servizos Sociais, Ana Barreiro, presentou este xoves 9 de marzo un novo paquete de accións formativas para a cidadanía, a desenvolver estes meses de primavera dentro do Programa de Dinamización e Promoción Social das Persoas Maiores.
No programa hai propostas innovadoras como os obradoiros que se van realizar sobre patchwork, autocoidado da imaxe e musicoterapia, cursos aos que se engade unha actividade formativa sobre poda, que se desenvolve este mes, entre o 20 ao 21 de marzo, de 9.30 a 13.30 horas no Centro Social de Oleiros e estará impartido por Carmen Freire.
Os obradoiros de musicoterapia, que correrán a cargo de Esperanza Mara, terán lugar nas parroquias de Aguiño (no Conservatorio, os días 14, 21 e 28 de marzo e o 4 de abril, de 11 a 12 horas), Corrubedo (no Centro Social, os días 14, 21 e 28 de abril e 5 de maio, de 17 a 18 horas), Ribeira (no Espazo Xuvenil os días 12, 19 e 26 de maio e 2 de xuño, de 17 a 18 horas) e Palmeira (na Casa do Mar, os días 7, 14, 21 e 28 de xuño, de 11 a 12 horas).
O taller de autocoidado da imaxe será impartido por profesores da Academia Yara e terá lugar nas nove parroquias, en horario de 16.30 a 18.30 horas: Oleiros (22 de marzo), Corrubedo (29), Aguiño (19 de abril), Castiñeiras (26), Artes (3 de maio), Carreira (10), Palmeira (24) e Ribeira (31).
En canto ao obradoiro de patchwork, celebrarase entre o 3 de abril e o 26 de xuño nas aulas da rúa Cristóbal Colón, en horario de 18.15 a 20.15 horas).
Ana Barreiro (quen estivo acompañada da técnica municipal Nieves Lampón) avanzou algúns datos sobre outras accións formativas que se van realizar en colaboración coa Escola Galega de Saúde. Así, o 24 de marzo terá lugar un curso sobre primeiros auxilios na Aula do Maior Aguiño, en tanto que o Centro Cultural Lustres Rivas (de 16.30 a 20.30 horas) acollerá unhas xornadas sobre saúde entre o 13 de abril e o 11 de maio. Tamén están previstos outros cursos de problemas de conduta e accións de novas tecnoloxías na adolescencia; alimentación e nutrición nos maiores; reumatoloxías e xestión da dor; resolución de conflitos; e un segundo curso de primeiros auxilios.
Máis información e inscricións (totalmente gratuítas) no Departamento de Servizos Sociais Comunitarios (teléfono 981 874 131 / mail servizossociais@ribeira.gal).
