O alumnado-traballador do Obradoiro Dual de Emprego Pazo de Rianxiño, coa intención ampliar e completar a súa formación, visitou as instalacións da Estación Fitopatolóxica do Areeiro e o Centro de Investigación Forestal de Lourizán, ambas situadas en Pontevedra.
Segundo explicou o Concello de Rianxo (responsábel do obradoiro) a Estación Fitopatolóxica Areeiro ten un alto prestixio no ámbito da sanidade vexetal, na investigación e experimentación sobre cultivos forestais, agrícolas e ornamentais, como a camelia, e na defensa e conservación do patrimonio vexetal. Conta con laboratorios dedicados ao diagnóstico e investigación das pragas e enfermidades dos vexetais, á edafoloxía e a estudos de cultivos. Dispón asemade dunha colección de camelias de máis de 1.000 exemplares, xardín de aromáticas e outras especies vexetais que “fai que sexa un xardín cun carácter didáctico moi interesante”.
A visita dos alumnos-traballadores de Rianxo realizouse con guías especializados que explicaron o traballo que alí se realiza, así como o patrimonio que forman os seus xardíns.
Pola súa banda, o Centro de Investigación Forestal de Lourizán desenvolve proxectos de investigación en diferentes áreas do seu ámbito de acción. É pioneiro no desenvolvemento e posta en práctica de numerosos produtos e tecnoloxías forestais. Leva a cabo numerosos proxectos e ensaios forestais e conta así mesmo co xardín botánico máis importante de Galicia, con árbores incluídas no Catálogo de Galego de Árbores e Formacións Senlleiras de Galicia.
Tanto a Estación Fitopatolóxica Areeiro como o Centro de Investigación Forestal de Lourizán contan con contornas axardinadas de alto valor e de interese para ambos certificados.
O obradoiro
O Concello de Rianxo puxo en funcionamento o Obradoiro Dual de Emprego Pazo de Rianxiño, co obxectivo de formar a 15 alumnos/as traballadores/as na especialidade de Instalación e mantemento de xardíns e zonas verdes.
O obradoiro, impulsado polo Goberno local, conta con financiamento da Consellería de Promoción do Emprego e Igualdade da Xunta, que lle concedeu ao Concello unha subvención de 377.990,25 euros. A actividade formativo-laboral destínase como dixemos a 15 alumnos/as-traballadores/as, con contratos de formación dunha duración de 12 meses e o seu correspondente profesorado.
O alumnado recibe formación no ámbito da instalación e o mantemento de xardíns e zonas verdes, centrándose nas áreas exteriores de lecer do Pazo de Rianxiño e contribuíndo ao seu mantemento e mellora, “á vez que aprenden un oficio con amplas perspectivas de emprego”, explicou no seu día o Concello, engadindo que os traballos abranguen a conservación das arbores con valor ornamental, o acondicionamento de zonas axardinadas, a accesibilidade as mesmas pensando nas futuras usuarias e usuarios do Centro de Día. Amais, contémplase tamén a eliminación das especies danadas e achégase o mantemento da finca durante un ano.
Por outra banda, estase a formar ao alumnado do obradoiro en sementeiras, plantacións, cortas, sistemas de rega, tratamentos fitosanitarios, entre outros ámbitos profesionais.
O anterior obradoiro realizado en Rianxo o ano pasado centrouse nos menores de 30 anos e levou por nome Carnero Valenzuela II de confección e publicación de páxinas web.
