O Concello de Noia e a Universidade de Santiago de Compostela poñen en marcha unha nova edición do programa Camiños de Coñecemento e Experiencia, proxecto da USC dirixido á democratización do coñecemento para persoas maiores, descentralizado nos concellos. Trátase, en concreto, dunha iniciativa gratuíta de formación universitaria dirixida a maiores de 50 anos.
A Concelleira de Eventos, Beatriz Rosende, explicou que o programa levarase a cabo no Edificio do Casino, na Rúa Galicia, e que o prazo de inscrición está aberto ata o 27 de marzo. A matrícula pode formalizarse no Concello de Noia. A axenda inclúe media ducia de actividades, abordando cuestións como os novos retos socioeconómico, o ecobriefing, a escritura na historia, a arqueoloxía ou, tamén, os recursos dos que se poden botar man para termos un sono de calidade.
