Boiro realiza obras de pavimentación nun camiño de acceso ao CEIP de Escarabote

O Concello de Boiro inicia a execución de obras para o arranxo dun camiño en Escarabote. As actuacións forman parte do Proxecto para o arranxo de camiños na Arribada, en Cespón, e no acceso ao CEIP de Escarabote, dun importe de 30.434,17 euros financiados mediante fondos propios do remanente
de tesourería.
As actuacións que se están a executar pretenden a renovación dun camiño que serve de paso entre a estrada xeral de Escarabote e o centro educativo. “Trátase dunha zona moi transitada e que serve de paso peonil tanto para os nenos e nenas que van camiñando ao colexio, como para os veciños da zona que acceden ao núcleo de Escarabote”, afirmou o alcalde.
A pista existente presentaba un mal estado xeral por esgotamento da vida útil do pavimento e non contaba con cunetas polas que discorrer a auga da choiva. A solución que se pretende adoptar contempla a reposición do pavimento existente nun tramo duns 70 metros lineais e dun ancho medio de 4 metros, para realizar un acabado con soleira de formigón.