O vello inmóbel da comisaría da Policía Nacional en Ribeira, na rúa Miguel Rodríguez Bautista, recibiu este mércores 8 de marzo a visita de representantes do Concello de Ribeira, da Concellería de Educación e do Colexio O Grupo, co obxectivo de afondar en posíbeis xeitos de ampliar o centro educativo ribeirense empregando o edificio anexo cedido á Xunta (a antiga comisaría, cuxos efectivos foron trasladados ás novas instalacións do barrio de Fontán, no Touro).
Na visita participaron o alcalde Manuel Ruiz, o xefe territorial de Educación, Indalecio Cabana; o xefe de servizo da unidade técnica, Adolfo Villaverde; e máis a directora do Grupo, Nieves Lampón.
A accións prioritarias máis demandadas polo Grupo, con 429 alumnos a día de hoxe, teñen que ver coa necesidade de dispoñer dun espazo para psicomotrocidade, despachos axeitados para o persoal e a ampliación da biblioteca escolar, o cal podería resultar factíbel nunha primeira fase das obras de remodelación que se centrarían na primeira planta do edificio, ademais de afectar a unha parte do propio O Grupo.
A tal efecto, a intención sería acometer as obras pertinentes durante este verán de tal xeito que puidesen estar listas no próximo curso 2023-2024. O Concello amosou a súa disposición a colaborar e axudar a resolver as carencias de espazo que posúe a día de hoxe o colexio ribeirense.
