Os socialistas de Ribeira, a través do seu concelleiro-portavoz José Manuel Vilas, presentaron un rogo para ser debatido en pleno relativo ao estado no que se atopa o rueiro de varias zonas da cidade, logo das das obras de pavimentación recentes alí realizadas, que, segundo apunta o PSOE, “presentan eivas evidentes no remate do seu firme, o que está a causar molestias á cidadanía”. O grupo recoñece ter recibido queixas da veciñanza “ante a constatación do desgaste do pavimento continuo, en apenas un ano da actuación realizada, malia que o formigón é un material que pode durar 100 anos sen deterioro”.
Os socialistas que din as deficiencias preséntanse con forma de “coqueiras, descalces, degradación, agretado da calzada, eivas motivadas por un proceso de fraguado do formigón insuficiente, por unha composición do formigón inadecuada, ou polas imprimacións de resina non axeitadas”. No seu comunicado engaden que o control das condicións de traballo e o emprego das ferramentas e técnicas construtivas axuda a evitar problemas nas obras, e tamén dotacións, os tempos entre capas e os tempos de entrada en carga son fundamentais para unha solución duradeira no tempo”.
O PSOE sinala que as tramas urbanas seguen nas mesmas condicións sinaladas a día de hoxe, “pese a ter sido obxecto de varios arranxos, polo que de maneira indiscutíbel as rúas están a ser desatendidas por parte da Administración local”.
En virtude de todo o exposto, o Grupo Municipal Socialista PSdeG- PSOE, fai ao equipo de Goberno do Concello de Ribeira o seguinte rogo:
1.- Que requira as contratas pertinentes a reparar as obras e traballos mal executados, na rúa Miñoteiro, rúa Romero Ortíz, Paseo das Carolinas, Parque García Bayón, rúa de Lugo, entre outras, co fin de “plasmar nelas a calidade de obra pretendida”.
2.- Que por parte da Delegación de Urbanismo, ou persoal director de obras, se faga un control mais exhaustivo durante a execución das obras licitadas e proxectadas polo Concello de Ribeira.
