A dirección do Partido Popular na provincia da Coruña, encabezada polo seu presidente, Diego Calvo, avalou a Marisol Boga como candidata dos populares no Concello de Dodro nas eleccións municipais do próximo mes maio.
Nada en Dodro (1965), a nova cabeza de lista dos populares coñece á perfección a actividade política local, tendo en conta que leva dezaseis anos como concelleira, os catro primeiros na oposición, oito como tenente alcalde e responsable da área de servizos sociais e os catro últimos tamén na oposición.
Boga decidiu dar o paso á primeira liña da política municipal avalada e apoiada pola dirección provincial e despois de que o partido lle mostrase total confianza para liderar un proxecto que ten como obxectivo gañar as eleccións en Dodro e recuperar a alcaldía perdida no ano 2019.
Neste sentido, a líder dos populares no municipio comprometeuse a confeccionar un proxecto “amplo” no que, asegurou, terán cabida todas aquelas persoas que compartan a ilusión de presentar unha alternativa “seria e ambiciosa” coa que poñer punto e final a un Goberno Municipal sen proxecto e incapaz de propoñer medidas para deseñar o futuro do Concello de Dodro.
