O Concello de Ribeira fixo un novo balance das obras que se están a realizar na Casa da Xuventude de Galicia, cuxo aspecto exterior, informou o Consistorio, vén de “experimentar un cambio significativo logo de proceder á demolición do muro situado na parte frontal do edificio, e o recubrimento do chan na parte traseira”. O obxecto desta obra reside en mellorar a integración do inmóbel no entorno ao tempo que se crean tres pequenas prazas con acceso dende a vía pública, dúas das cales resultarán das dúas intervencións antes descritas.
O Concello lembra que está pendente unha terceira praza a través do derrubo doutro tramo de muro na parte lateral que mira á travesía que separa o edificio do Colexio Galaxia.
O Concello sinala que estas actuacións están sendo efectuadas pola empresa Civis Global, en tanto que da man da Brigada Municipal de Obras tamén se está a traballar no interior do edificio para reconverter un dos seus albergues nunha sala de usos múltiples (mantense o outro con capacidade de 22 prazas).
Ademais, engade o Concello, nos últimos meses executouse unha actuación que tivo por obxecto mellorar a súa impermeabilización, ademais de sanear humidades e filtracións de auga e reparar as instalacións de electricidade e fontanería.
Outras melloras en Abesadas
Xunto a esta reforma da Casa da Xuventude, dende o Concello se están emprendendo outras iniciativas de “mellora en Abesadas”, entre as que se contan a próxima conexión do barrio coa zona dos Xulgados a través da ampliación da rúa Barbanza, a construción do novo Auditorio, a renovación do pavimento do parque de Abesadas, a cuberta do parque infantil, a dotación de luminarias e asfaltado a un dos estacionamentos gratuítos, a mellora do firme na rotonda da Poutada e nas vías lindeiras, ou a apertura dunha senda ata o parque de San Roque paralela ao río Pedrín.
