A Asociación Deloa e o Concello de Noia presentaron o programa de formación en mercadotecnia dixital e cooperativismo que prepara no municipio (e na comarca do Barbanza) a dita asociación. A cita foi no Edificio do Casino e tivo formato de xuntanza informativa para coñecer con máis detalle esta iniciativa. Segundo se fixo saber, as inscricións aínda están abertas e poden formalizarse a través de número de teléfono 981 817 000.
O programa
A Asociación Deloa, en colaboración coa Escola de Organización Industrial (EOI), vai pór en marcha nos concellos da comarca do Barbanza unha acción formativa centrada na mercadotecnia dixital e no cooperativismo.
Este programa, sinala Deloa, é “unha gran oportunidade de incorporación ao mercado laboral para mozas e mozos entre 16 e 29 anos, xa que poderán adquirir todos os coñecementos para crear unha cooperativa de servizos de marketing en liña e aprender da e dos mellores profesionais e coñecer os seus casos de éxito”.
Deloa está a desenvolver estes días xuntanzas informativas nos concellos onde se vai desenvolver a formación: Boiro, Rianxo, Rois, Dodro, Noia, Lousame e Outes.
