O Concello de Boiro colabora co Club de Remo de Cabo de Cruz na organización da XX Regata Contra Reloxo Cabo da Cruz que terá lugar este domingo 5 de febreiro no Peirao de Cabo de Cruz. Na presentación, que tivo lugar esta mañá, participaron a concelleira de Deportes, Dores Torrado, e o
presidente do club, Luís Piñeiro, que estiveron acompañados de outros membros da directiva.
A regata realizarase na modalidade Contra Reloxo e van participar todos os equipos masculinos e femininos na categoría de absolutos/as, veteranos/as, mixta e de base. Ás 10.00 horas terá lugar o remo de mar e ás 11.30 horas as traiñeiras. “Contamos coa participación de 40 embarcacións e unhas 20 en
remo de mar, unha modalidade que incluímos este ano”, afirmou o presidente do club Luís Piñeiro.
A concelleira de Deportes, Dores Torrado, convidou a todo o mundo a achegarse a ver esta proba que marca o inicio do calendario do remo no noso municipio e que vai pola súa XX edición “algo que é froito do gran traballo do club e que ademais inclúe unha nova modalidade como é o remo de mar”.
Ademais a concelleira recoñeceu que “a celebración desta proba supón un impulso económico para o noso municipio xa que participan equipos que veñen de municipios de todo o territorio nacional”.
O novo presidente do club, Luís Piñeiro, aproveitou a comparecencia para falar dos obxectivos da nova directiva e que pasan por “seguir unha liña continuísta de traballo coas bases, formación de talentos e manter obxectivos de cara á ACT”. Do mesmo xeito falou do gran reto da participación do equipo
feminino na Liga Euskotren: “Son un grupo moi xoven e están adestrando moi ben. A competición ten un nivel moi alto e queremos estar á altura”, recoñeceu Luis Piñeiro.
