Rianxo vai acoller esta tempada (os meses de marzo, abril e maio) unha Escola de Emocións organizada pola Concellería de Benestar Social, Igualdade e Diversidade. Trátase dunha iniciativa para persoas maiores de idades cuxos obxectivos xerais son dotalas de ferramentas e recursos emocionais que melloren as súas vidas, fomentar o autocoñecemento e achegar o mundo emocional á súa vida cotiá.
Segundo informa o Concello acerca dos porqués da posta en marcha desta escola, “na actualidade existe unha gran necesidade de cultivar e ordenar o mundo emocional, mais moitas persoas carecen de recursos para facelo”, e para emendar estas eivas habilitouse esta Escola de Emocións, “que ten a finalidade de crear un espazo onde eses recursos sexan accesíbeis á poboación , ofrecendo ferramentas útiles e sinxelas que poden crear un gran impacto beneficioso nas súas vidas”.
Actividades previstas
Cada obradoiro constará de unha primeira parte que consistirá en dar información (fase cognitiva):
Que é a emoción.
Cal é o seu estímulo.
Como funciona.
Cal é a súa finalidade.
Identificar os estímulos e a emoción que lles corresponde a cada un, poñendo o foco no medo, a tristura e a rabia.
O programa inclúe unha segunda parte con dinámicas de movemento: vivenciar sensacións, expresalas a nivel corporal e construír metáforas de aprendizaxe que activen todo o potencial emocional.
Datas
-Marzo: 9, 16, 23 e 30
-Abril: 13, 20 e 27
-Maio: 4
Horario: de 17:30 a 19:30 horas
Lugar
Salón de actos do Auditorio Municipal.
Inscricións
Haberá que facelas antes do 3 marzo. As prazas son limitadas (981 860 061 ou 604 024 012).
Trátase dunha actividade subvencionada polo Pacto de Estado contra a Violencia de Xénero do Ministerio de Igualdade.
