Rematado o novo poliduto que conectará as instalacións de Repsol no porto exterior de Langosteira coa refinería de Bens, na Coruña, o vindeiro 3 de maio vai ter lugar a inauguración oficial da Terminal de petroleiros que Repsol ten situada no devandito porto exterior. Con esta estrea o cru circulará polo novo poliduto (tubaxe de calibre groso para o transporte de petróleo e outros líquidos e gases) ao mesmo que o peirao continúa a recepción de produtos refinados.
Esta modificación nas instalacións petrolíferas de Repsol na Coruña, significará unha operación económica, social e portuaria marcada pola liberación do peirao de San Diego no que, desde vai perto de 60 anos, operaba a compañía petroleira Campsa e, posteriormente, a actual Repsol. As operacións desta empresa van ter continuidade ata o ano 2027 que remata a concesión. Deste xeito, o resto de produtos refinados aquí elaborados seguirán chegando ao anteriormente citado peirao, polo menos de momento.
Para chegar a esta situación, Repsol investiu máis de 126 millóns de euros na obra mariña do pantalán, o poliduto, as instalacións auxiliares e as pertinentes modificacións nas do centro de refinado de Bens. Ese novo poliduto conectará as instalacións de Repsol no porto exterior coa refinería nun percorrido de 3,8 quilómetros de lonxitude e 11 tubaxes das que dúas están destinadas ao transporte de cru: unha trasfegará as augas e as oito restantes levarán ás terminais outros produtos. Unha nova estrutura disposta para evitar que o cru continúe a circular polo vello poliduto que obrigou no seu día a abrir moi importantes fendas en barrios da cidade que mesmo deron nome a un destes: viaduto.
Vai 59 anos que chegaba ao peirao de San Diego o primeiro petroleiro, o Valmaseda , que desde 1964 foi un asiduo visitante do porto da Coruña. Chegou cunha carga de 20.000 toneladas de petróleo e abriu unha extensa lista de petroleiros que promediaban máis dun cento cada ano para depositar nos pantaláns petrolíferos do porto coruñés a súa prezada, perigosa e cara carga. Inesquecibles, a máis, os accidentes de `petroleiros aquí rexistrados; o Urquiola e o Aegean Sea (ou Mar Exeo), así como os vertidos rexistrados nas manobras dos buques para a carga e descarga dos produtos.
Cando as función do peirao interior da refinería deixen de estar en disposición de prestaren servizo, a Autoridade Portuaria da Coruña liberará un espazo de case que 400.000 metros cadrados (incluída a terminal).
