A compañía de danza Marta Alonso Tejada estivo estas semanas ultimando os seus novos proxectos escénicos a través dunha residencia na Sala Arcos Moldes do Auditorio de Rianxo, concretamente preparando a súa nova produción Sofá, a versión para espazos interiores. A preestrea será no auditorio rianxeiro o vindeiro sábado 4 de marzo, ás 20.30 horas. Trátase dunha obra destinada a tódolos públicos, de 60 minutos de duración, cuxo argumento preséntanos a unha parella no seu sofá, Marta e Pablo, os dous grandes protagonistas da peza…. xunto co sofá.
Sinopse
O sofá é o lugar no que descansan e esquecen o que está fóra. O mundo: traballo mal remunerado, guerra, ameazas nucleares, catástrofes ecolóxicas, virus asasinos invisibles, normas arbitrarias, pobreza, esgotamento. Pablo e Marta están enfermos. Enfermos de cansazo e aburrimento. Pero téñense a unha ó outro, teñen un sofá, e saben bailar. Non todo está perdido.
