Esta fin de semana a comarca celebrou diversos actos co gallo do Día de Loita contra o Cancro, promovidos pola delegación en Ribeira da AECC: peditorio anual nas rúas da cidade; gala solidaria de patinaxe no pavillón de Sirves e misa na Igrexa de Palmeira.
Voluntarias da Asociación Española contra o Cancro de Ribeira distribuíronse nas catro mesas informativas que se instalaron nas rúas da cidade co obxectivo de recadar fondos para unha causa que é de todos. Un bo número de persoas achegaronse ás mesas : «Noutras ocasións vendemos material, pero esta vez só damos información e temos o peditorio e vai moi ben, como sempre», contaban as voluntarias situadas na rúa Galicia. Na praza do Concello, a sensación era a mesma: «Imos moi ben, a solidariedade da xente é fabulosa».
En Boiro, ademais de mesas informativas, tamén se contou coa participación de voluntarios para formar un enorme lazo humano de cor verde, como símbolo de visibilización e apoio aos miles de pacientes que sofren cancro. Baixo uns paraugas da cor da esperanza, preto de medio centenar de persoas debuxaron un gran lazo sobre o pavimento da rúa peonil boirense.
