O Concello de Ribeira informou de que o proxecto para renovar a liña de auga para consumo e a instalación de pluviais en Ameixida (Castiñeiras) recibiu finalmente un total de seis ofertas. A mesa de contratación procedeu na mañá deste 10 de xaneiro á apertura dos sobres C, correspondentes ás propostas económicas. O orzamento base desta actuación ascende a 107.627 euros, IVE incluído. A obra está enmarcada no Plan Provincial de Cooperación ás Obras e Servizos de Competencia Municipal (POS+ 2022) e, segundo informou o Concello, viña sendo “moi esperada pola veciñanza para poñer solución aos problemas de abastecemento rexistrados nos últimos tempos en Castiñeiras”.
Para alcanzar este obxectivo vanse substituír as tubaxes existentes por outras tres: unha de PVC de alta densidade e 160 mm. de diámetro na marxe dereita; outra de polietileno de alta densidade de 0,75 mm. de diámetro, na marxe esquerda; e unha última de PVC 0 125 mm de diámetro, nun cruce, para o cal será necesario a instalación de maquinaria para perforación horizontal dirixida.
No relativo á rede de pluviais, dispoñerase pola beirarrúa da marxe dereita da estrada un colector de PVC corrugado SN-8 de 315 mm e construiranse arquetas sumidoiro e pozos de rexistro de formigón prefabricado.
Os pavimentos de ambas as marxes da estrada serán renovados, cunha subbase de saburra e unha capa de acabado de mestura bituminosa en quente. As beirarrúas repoñeranse co mesmo pavimento (baldosa hidráulica).
O prazo de execución son tres meses.
