O Concello de Ribeira puxo o foco na mellora e posta a punto do seu mobiliario urbano, facendo fincapé en embelecelo. Este obxectivo estase a materializar coa adquisición de elementos máis integrados e sustentábeis e “cunha meirande resistencia ás condicións climatolóxicas adversas pola nosa localización xeográfica”, explican fontes do Consistorio, que estende esta liña de traballo aos baños das praias, que até o de agora víñanse contratando todos os anos “mediante o correspondente expediente de contratación e por un período concreto do ano”. Búscase, amais de facelos máis resistentes e estéticos, máis accesíbeis.
Con tal motivo, vense de contratar a colocación no paseo de Coroso dun módulo prefabricado co que “se pretende satisfacer esta necesidade de dispoñer de aseos públicos durante todo o ano e á vez dar cumprimento ás condicións básicas de accesibilidade para o acceso e utilización dos WC nas praias para persoas con mobilidade reducida”, sinala o Concello.
A actuación será acometida por Montajes y Estructuras Patiño, S.L.U, e supón un investimento de 39.930 euros, IVE incluído.
O cerramento exterior do módulo estará formado por unha fachada composta de dúas follas, unha exterior e outra interior. Como equipamentos, disporá de 7 unidades de inodoros cerámicos de cor branca (un dos cales será adaptado e deberá ir equipado cunha barra de suxeición con forma de U), tres lavabos, tres espellos e un cambiador de cueiros, entre outros elementos,.
Así mesmo, o módulo disporá de rampla de acceso adaptada.
