O vindeiro luns 29 de xaneiro celebrarase unha nova edición da Trail da Cidá. Con esta proba, inaugurarase unha nova edición das Trail Series que promove a asociación Arousa Neo, que darán cabida tamén a outras dúas citas: o Trail de Outes (5 de marzo) e o XToSínTrail (21 de maio).
Para presentar a iniciativa compareceron no Consistorio ribeirense os concelleiros de Deportes de Ribeira, Outes e Porto do Son, Javier Sampedro, Juan Pouso e Daniel Rodríguez; ademais do tamén sonense Manel Deán e de Eduardo Iglesias no nome da asociación organizadora.
No relativo ao Trail da Cidá, regresa ao calendario das Trails Series despois de dous anos nos que caeu do cartel por mor da pandemia (no canto dela, disputouse o Trail de San Alberte). Tamén cambiou de localización o Trail de Outes, que pasa do Freixo ao entorno de Ponte Nafonso.
Na presentación lembraron outra novidade a destacar: que cada unha das citas terá dúas distancias alternativas: unha modalidade curta de 13-14 quilómetros e unha larga de 21 para a xente que se sinta con forzas para retos máis esixentes.
As persoas interesadas en apuntarse a todo o circuíto dispoñen ata este domingo para facelo na páxina web trailseries.run, en tanto que para a proba ribeirense “aínda hai de marxe ata o martes”, sinalaron os participantes na presentación, engadindo que a día de hoxe (este venres 20 de xaneiro) hai anotadas 80 persoas para o circuíto, máis outras 60 individualmente para a carreira da Cidá.
A organización agarda chegar aos 200 participantes.
Os representantes dos Concellos de Outes, Porto do Son e Ribeira felicitaron a Arousa Neo pola iniciativa. Tamén se agradeceu a colaboración do patrocinador Revolutrion e dos clubs Sachacamiños e CAO de Outes.
