A Deputación da Coruña, no marco do Plan de Emprego Local, vén de publicar as bases reguladoras das axudas PEL 2023, que veñen con catro modalidades dependendo das necesidades das empresas e das persoas autónomas. As axudas poñen novamente o foco en contribuír á dixitalización das firmas da provincia, ao fomento do traballo por conta propia e á creación, ampliación e mantemento dos cadros de persoal das empresas. Pódense consultar polo miúdo no Portal de Emprego da Deputación da Coruña.
-PEL Emprende Investimento. Axudas para a consolidación e o fortalecemento do tecido empresarial nos concellos da provincia da Coruña a través do apoio ao investimento en bens inventariábeis. A contía dispoñíbel é de 2.760.000 euros. Os gastos obxecto de subvención serán os seguintes: aplicacións informáticas, maquinaria, mobiliario e equipos para procesos de información (computadores e demais conxuntos electrónicos). O importe mínimo a conceder é de 2.450 euros e o máximo de 17.500.
-PEL Autónom@s. Axudas ao fomento do emprendemento e ao traballo por conta propia nos municipios da provincia da Coruña de menos de 20.000 habitantes. A contía total é de 1 millón de euros. O importe mínimo a conceder é de 1.200 euros e e o máximo de 2.400.
-PEL PEMES Creación e Ampliación. Axudas á creación e ampliación do cadro de persoal de pequenas, medianas empresas e microempresas. Cóntase neste punto cunha contía de 2.894.000,00 euros. O importe mínimo da subvención será de 1.000 euros e o máximo de 15.000.
-PEL PEMES Mantemento. Axudas ao mantemento do cadro de persoal de pequenas, medianas empresas e microempresas. A contía é de 1 millón de euros. O importe mínimo das axudas será de 1.000 euros e o máximo de 11.000.
As bases das axudas PEL 2023 poden consultarse no Boletín Oficial da Provincia núm.19 do 27 de xaneiro de 2023.
O prazo previsto para a presentación de solicitudes permanecerá aberto desde o día seguinte da publicación da convocatoria no BOP ata o 10 de marzo ás 14.00 horas.
As solicitudes, unha vez aberto o prazo, presentaranse de xeito telemático a través da plataforma SUBTeL.
