As nenas Triana García Lema, de 6 anos de idade e estudante no Colexio A Milagrosa de Oleiros, e Antía Prol Teira, de 11 anos e alumna do Colexio Galaxia (Santa Uxía), resultaron as dúas gañadoras do Concurso Escolar de Debuxo do Concello de Ribeira destinado a seleccionar as creacións que ilustrarán o cartel de Nadal e a postal do Concello, respectivamente.
A concelleira de Cultura María Sampedro mostrou este venres 9 de decembro ambos debuxos nun acto de presentación no que estivo acompañada das dúas novas artistas no salón de plenos do Consistorio local.
O debuxo de Antía representa unha árbore de Nadal coas cores da bandeira da inclusión para simbolizar “o Nadal é para todos” (en palabras da propia ilustradora); mentres que o de Triana exhibe aos tres Reis Magos sobre un fondo azul.
A edil ribeirense, que agradeceu aos colexios e as familias que se involucrasen nesta iniciativa, fixo entrega dos premios ás pequenas, consistentes en 150 euros en cada unha das modalidades distribuídos en bonos a investir en varios comercios locais (Podium Sport, Libros Ari e Librería Mirás).
En total presentáronse ao concurso unhas 500 creacións. O xurado estivo composto por Unai González, Fernando Yáñez e Eugenia Gómez, actuando María Sampedro como presidenta e Sara García como secretaria.
