Rianxo contará no 2023 cunha das tres primeiras bases de unidades operativas (BUO) dos servizos de loita contra o lume.
Esa base será o centro de operacións dos equipos de extinción, e alí concentraranse non só as brigadas contraincendios, senón tamén outros traballadores do servizo, como axentes forestais ou condutores das motobombas. Tamén haberá espazo para o parque de vehículos vinculado aos operativos.
A Consellería do Medio Rural e o Concello chegaron a un acordo para a cesión dunha parcela municipal no polígono empresarial de Te para a implantación do servizo.
Sobre o terreo cedido polo Concello levantarase un complexo cunha superficie total de 400 metros cadrados. A base desde a que se dirixirán os operativos contará con zona de descanso para o persoal de extinción de incendios, vestiarios, aseos, despachos e almacéns para o material. Así mesmo, no exterior haberá espazo de garaxe para vehículos e motobombas.
Nestas instalacións de nova creación, que segundo as previsións da Administración autonómica estarán operativas antes de que arrinque a nova tempada de alto risco de incendios o próximo verán, investiranse máis de 635.000 euros.
Ademais da de Rianxo, no 2023 está previsto habilitar sedes en Mondoñedo e en Muíños. A rede irase ampliando nos exercicios posteriores ata a creación de 15 centros en todo o territorio.
