A subdelegada do Gobierno na Coruña, María Rivas, fixo balance este luns 12 do desenvolvemento do Programa Único – Banda Larga na provincia. Achegou os datos no marco dunha xuntanza co xefe provincial de Inspección de Telecomunicacións da Coruña do Ministerio de Asuntos Económicos e Transformación Dixital, Enrique Fernández Cancio. Rivas valorou que na segunda convocatoria do plan, resolta este outono, a provincia benefíciase dun investimento de 13,4 millóns de euros para levar a conexión a Internet de alta velocidade a 36.556 fogares e empresas das chamadas zonas brancas, que son aquelas que non dispoñen de cobertura de redes de velocidade de polo menos 30 Mbps, nin plans para a súa dotación nos vindeiros tres anos.
“A conectividade é un elemento básico para garantir a supervivencia dos pequenos concellos; é unha arma contra o despoboamento”, destacou María Rivas.
Durante o encontro, o responsábel provincial de Telecomunicacións e a delegada abordaron a execución do plan e a necesaria cooperación entre as distintas administracións implicadas. A subdelegada lembrou que o Plan Único diríxese a alcanzar “unha taxa de cobertura de moi altas capacidades do 100% da poboación en 2025”. Segundo engadiu, esta segunda convocatoria triplica o nivel investidor da primeira, resolta en 2021, na que corresponderon á provincia 4,7 millóns de euros cunha achega de 3,5 millóns por parte do Ministerio e para levar a fibra ultras rápida a 15.923 familias e empresas. Tamén fixo saber que España está á cabeza de Europa en conectividade, cunha cobertura de banda larga a 30 Mbps do 96% do territorio -o 91% nas zonas rurais- e do 88,3% a velocidade de 100 Mbps.
