O Concello de Ribeira acaba de ser informado da sentenza ditada polo Xulgado Contencioso Administrativo Número 1 de Santiago en procedemento ordinario nº 173/2021 seguido contra a concesión da licencia de legalización a Puntos de Bajo Coste, S.L.: unha resolución que declara a nulidade desa licenza tal como era esperado por parte dos servizos xurídicos municipais, habida conta de que emana do mesmo Xulgado que xa estimou con anterioridade o incidente de nulidade presentado contra esa mesma licenza, e cuxo auto está recorrido ante o Tribunal Superior de Xustiza de Galicia. De feito a
sentenza, sen entrar a analizar as cuestións de feito obxecto de proba, transcribe literalmente os razoamentos daquel auto.
Fronte a esta nova sentenza vaise interpoñer recurso de apelación para que sexa o Tribunal Superior de Xustiza de Galicia o que, como xa se ten solicitado no recurso pendente, entre no fondo do asunto
que se dirime e dea a razón ao Concello, sobre a base de que se actuou conforme a lexislación vixente, tendo en conta a documentación presentada, na que non tivo intervención o Concello, respectando a natureza regrada das licenzas, e contando con todos os informes sectoriais, e preceptivos, favorables.
Cómpre aclarar en todo caso que a nova resolución non é firme e non leva aparellada ningún tipo de responsabilidade patrimonial para a administración municipal.
