Membros do BNG ribeirense estiveron este 1 de decembro apoiando á veciñanza de Corrubedo nas súas xa habituais mobilizacións de cada xoves para reclamar a mellora do servizo médico na vila, cuxo centro de saúde corre risco de botar o peche, segundo levan advertindo dende hai meses, xunto con outras agrupacións locais como o PSOE de Ribeira. En concreto, BNG e veciñanza pediron que se cubra a única praza de médico da parroquia.
A concelleira Cruz Rivadulla Márquez denunciou que “a falta de profesionais médicos e recursos que padecen os centros de saúde de Ribeira non son froito da casualidade senón que se derivan dunha década de recortes aplicados na sanidade pública, provocando un colapso sen precedentes”.
Rivadulla pediu “dotar a Corrubedo de médico porque, do contrario, a poboación maior é a que paga asume as consecuencias de ter que desprazarse ata o xa colapsado Centro de Saúde de Ribeira en autobús ou en taxi, supoñendo un gasto económico, ou ben depender doutras persoas para o seu traslado”.
Desde o BNG sinalaron que “en Corrubedo falta médico” e “en Ribeira faltan 7 profesionais dos 14 que debería ter o Centro de Saúde”. E engadiron: “Pedímoslle ao PP que deixe de xogar coa saúde da xente, retire a pretensión de pechar os centros de saúde do rural e se poña a traballar para garantir unha atención sanitaria de calidade”.
No transcurso da mobilización Cruz Rivadulla mostrou o compromiso absoluto do BNG coas demandas da parroquia e declarou que “é urxente aplicar un plan de choque que permita cubrir o 100% das vacantes de persoal sanitario que garantan o dereito a ter un sistema público de saúde eficaz” concluíu.
