O Concello de Ribeira abriu o período de presentación de ofertas para a substitución do céspede artificial do campo de fútbol de A Tasca, situado na parroquia de Aguiño: unha intervención cuxo prezo de licitación ascende a 275.660,36 euros.
Segundo explica o Concello, o campo ten unhas dimensións de 102×62 metros cadrados e o actual terreo de xogo acusa un “notábel desgaste derivado dun uso intensivo e do propio paso de tempo, ademais de abultamentos e depresións nalgunhas zonas, o que aconsellaba a súa renovación”. A tal efecto, vaise desmontar e retirar a herba actual, incluído o árido, e situar no seu lugar un novo céspede sintético de última xeración mediante sistema tufting. Amais, colocarase novo equipamento deportivo, incluíndo porterías de fútbol 11 e fútbol 7, e picas de córner abatíbeis con bandeiriñas.
O prazo de execución dos traballos é dun mes e medio.
As empresas interesadas dispoñen ata o 26 de decembro para presentar as súas ofertas a través do Sistema de licitación da Xunta de Galicia.
