Galicia continuará baixo os efectos dunha borrasca activa, situada ao oeste de Irlanda, cunha fronte fría moi activa atravesando a Comunidade. Con esta situación, agárdanse ceos con cubertos e chuvias xeneralizadas, persistentes e por momentos de forte intensidade. As temperaturas sufrirán un lixeiro descenso. Os ventos soprarán frouxos, do suroeste, con algún intervalo de moderado no litoral.
Por outra banda a Dirección Xeral de Emerxencias e Interior da Vicepresidencia Segunda da Xunta acaba de activar a alerta laranxa por choiva no centro e sur da provincia de Lugo; no sur, noroeste e Miño de Ourense; e en toda a provincia de Pontevedra.
Segundo a Axencia Estatal de Meteoroloxía (AEMET), o fenómeno meteorolóxico adverso de nivel laranxa comezará a últimas horas de hoxe cunha precipitación acumulada en 12 horas de 80 mm. As provincias da Coruña e de Pontevedra están xa desde o mediodía en aviso amarelo, e as de Lugo e Ourense estarano a partir de media tarde, con precipitacións acumuladas que poden acadar os 50 mm en 12 horas e os 15 mm nunha hora.
Canto ao vento, un fenómeno meteorolóxico adverso de nivel laranxa en curso está a afectar á Mariña de Lugo e ao oeste da Coruña, con refachos de ata 100 km/h. No resto da provincia da Coruña e na de Pontevedra, así como na montaña e no centro de Lugo, hai nivel amarelo con refachos que poderán acadar os 90 km/h.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro Integrado de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Ante as fortes chuvias e o vento, recoméndase circular con precaución e informarse antes do estado das estradas, evitar pasar preto de árbores, paneis publicitarios, andamios e obxectos que poidan ser derrubados polo vento, non atravesar zonas inundadas ou que poidan chegar a asolagarse, non aparcar nas ribeiras dos ríos, non utilizar vehículos lixeiros nin de pouca estabilidade e retirar todos os obxectos que poidan caer á rúa desde tellados, balcóns e ventás.
Acónsellase consultar a páxina web do CIAE 112 (www.112galicia.org), que conta con información meteorolóxica e con ligazóns de interese.
O noso mar: Vento do sudoeste á mañá, do sudoeste á tarde e do noroeste á noite, forza 3 a 5 á mañá e 2 a 4 á tarde e á noite. Marusía á mañá e mar ovellado á tarde e á noite. Visibilidade mala á mañá e á tarde e regular á noite. Mar de fondo do oeste, con ondas de 3.5 a 4.5 metros.
Mareas
| Muros | ||
|---|---|---|
| Hora* | Altura | |
| Baixamar | 05:36 | 1.3 m |
| Preamar | 11:56 | 3.1 m |
| Baixamar | 18:16 | 1.2 m |
| Vigo | ||
|---|---|---|
| Hora* | Altura | |
| Baixamar | 05:32 | 1.3 m |
| Preamar | 11:50 | 3.0 m |
| Baixamar | 18:08 | 1.3 m |
| Vilagarcía | ||
|---|---|---|
| Hora* | Altura | |
| Baixamar | 05:35 | 1.3 m |
| Preamar | 11:52 | 3.1 m |
| Baixamar | 18:12 | 1.2 m |
Cámaras web da comarca (algunha pode nun funcionar puntualmente)
