Amicos, asociación inclusiva da nosa comarca, celebrou na mañá deste martes 20 de decembro un networking sobre oportunidades de emprego verde e azul nas Rías Baixas de Galicia. A sesión desenvolveuse no Centro de Interpretación do Parque Nacional das Illas Atlánticas de Galicia (Vigo). O evento reuniu representantes de administracións, empresas e persoal do Parque Nacional. Foi o broche final do itinerario promovido polo proxecto Innova-Emprego, que foi presentado pola Asociación Amicos á convocatoria de Empleaverde 2021 da Fundación Biodiversidad.
O proxecto Innova Emprego (Experiencias de Innovación Local para o Emprego) presentouse como un instrumento de transformación a través do cal as persoas participantes formaron parte dun itinerario no que recibiron formación, asesoramento e acompañamento gratuíto co obxectivo último de que poidan inserirse en empregos relacionados coa economía verde. Ademais, o foco centrouse en xerar novas oportunidades de emprego destinado a persoas que se atopan nunha situación de vulnerabilidade social, poñendo especial énfase na inserción daquelas con discapacidade intelectual, xa que é un dos colectivos máis afectados polo desemprego.
As Rías Baixas, a Dehesa Extremeña e o Campo de Xibraltar, son os tres escenarios que se elixiron como zonas de actuación deste proxecto. Para poder levalo a cabo, contouse coa colaboración de dúas entidades socias colaboradoras: o Parque Nacional Marítimo Terrestre das Illas Atlánticas de Galicia e a Asociación ASANSULL de Cádiz.
O networking deste martes estivo conducido por persoas con discapacidade intelectual, Javier e Carolina, que formaron parte activa do proxecto, dando paso a unha intervención inicial do director xeral de Amicos, Xoan España, e proseguindo logo coa técnica de emprego, Diana Cidras, e tamén con dous participantes do proxecto, Santiago Rodal e Javier Vidal, que debullaron a súa experiencia laboral traballando no Parque Nacional das Illas Atlánticas de Galicia.
Amais, contouse coa intervención do socio andaluz do proxecto, ASANSULL, entidade representada por Marta Fernández, técnica de proxectos, acompañada de David Núñez, participante na iniciativa, que falaron das súas experiencias en Innova Emprego.
No evento, púidose contar coa presenza de David Veiga, director de Recursos Humanos do grupo Puentes y Calzadas, Vicente Piorno, que representou ao PN das Illas Atlánticas de Galicia, Elena Rodríguez, da empresa People and Talent Kaleido Logistics, que falou sobre Responsabilidade Social Corporativa (RSC) na industria loxística, así como distintas empresas da zona relacionadas coa economía verde, entre elas Nutrigras, representada pola súa directora executiva Arancha Mañas. Tamén participou Sonia Atanes, directora de mercadotecnia en Pepe Vieira.
Como resultado do networking espérase formar unha rede de traballo nacional para a procura, detección e impulso de oportunidades de emprego verde ou azul adaptado, e na que se espera contar coa implicación de empresas e entidades públicas especializadas no sector da economía verde e social.
Este proxecto conta coa colaboración da Fundación Biodiversidad do Ministerio para a Transición Ecolóxica e o Reto Demográfico a través do Programa Empleaverde financiado polo Fondo Social Europeo.
