Tras 2 anos de pandemia, volveu o Festival de Nadal de Amicos. Fíxoo en formato creativo e con vontade de amosar polo miúdo as actividades que os rapaces e rapazas estiveron preparando as últimas semanas.
“Accións así favorecen a participación e inclusión das persoas na súa vida diaria, fomentan as relación interpersoais e axudan a previr o deterioro físico e cognitivo”, explicaron fontes da asociación no transcurso da actividade, que serviu para presentar (a xeito de apertura das actividades) o Calendario Solidario de Amicos, no cal colaboraron 25 empresas da zona, entre elas CONGALSA, GADISA e Bodegas Paco y Lola. A temática deste ano buscaba poñer en valor a diversidade e riqueza cultural da comunidade, así como valorar aos verdadeiros protagonistas: as persoas con diversidades funcionais e cognitivas.
No calendario amósanse diversos tesouros ambientais e paisaxísticos da contorna: Sálvora, o Faro de Corrubedo ou o Bosque Encantado de Aldán, entre outros espazos naturais.
A vicepresidenta de Amicos, Digna Iglesias, quixo dirixir unhas cálidas palabras aos asistentes: “Quero agradecer o apoio de Lesmes Fotógrafos, ao que lle fago unha especial mención e poñer en valor que despois de tanto tempo siga tendéndonos a súa man”. Tamén tivo palabras de agradecemento para as empresas colaboradoras, CONGALSA, GADISA e Bodegas Paco y Lola, pezas fundamentais da actividade de Amicos.
Por certo o calendario foi novamente elaborado con materiais de reciclaxe e, ademais, veu nesta edición cun redeseño da base. Pode adquirirse nos centros da entidade, en Boiro e Ribeira por 7 euros (o calendario de mesa) e 8 euros (o de parede). A recadación deste ano irá destinada a adquisición de equipos informático.
A xornada de celebración proseguiu co tradicional Festival de Nadal, coa interpretación de diferentes actuacións musicais e unha representación teatral a cargo do grupo da asociación, quen arrincou unhas cantas risas aos presentes.
Este festival busca fomentar o aproveitamento positivo do tempo libre e favorecer a autoestima de todas as persoas integrantes do evento. Mediante estas actividades, a Asociación Amicos contribúe ao desenvolvemento da tolerancia e comprensión.
