A Asociación Amicos e a conserveira JEALSA presentaron este martes 28 de novembro os detalles da nova edición, a quinta, do festival inclusivo e solidario Festiritititi. Segundo fixeron saber, o evento celebrarase este venres día 2 de decembro en Boiro e servirá, sinalaron, para celebrar o Día Internacional das Persoas con Discapacidade. “Será unha xornada moi especial para a nosa entidade, un día para celebrar entre amigas e amigos e compartir xogos e risas”, engadiron. O acto de presentación estivo encabezado por Javier Freijo e Raquel Rial, integrantes da asociación. Ambos avanzaron que Amicos ten “preparadas moitas sorpresas para todas as persoas participantes”. Na cita tamén participou Margarita Hermo, directora de relacións institucionais de JEALSA; e por parte do centro integral, asistiu a súa vicepresidenta, Digna Iglesias e a responsábel dos centros, Pilar Sampedro.
Segundo explicaron, nesta quinta edición o festival instáurase na sociedade como “un acontecemento anual”, xa que cada ano vai facéndose moito máis grande, “sendo un referente da inclusión social do Barbanza”.
Nesta nova edición está confirmada a presenza de case 1.000 escolares dos centros educativos da comarca, así como dos concellos de Lousame e Rois.
Tamén acudirán Fernando González Abeijón, director xeral de Persoas con Discapacidade, Judith Fernández Novoa, directora xeral de Ordenación e Innovación Educativa, e representantes dos concellos de Boiro, Ribeira, A Pobra, Rianxo, Lousame, Rois, Padrón entre outras autoridades.
O Festiritititi é un festival de inclusión a través do xogo, onde toda a comunidade está convidada: centros educativos, autoridades e familias. A cita arrincará ás 11.00 horas no Parque da Cachada en Boiro, desenvolvéndose as súas actividades ata as 13.30 horas. Ademais, ás 12.00 horas procederase á realización dunha actividade “moi especial para nenos, nenas e autoridades”, avanzaron na presentación.
Pola súa parte, Margarita Hermo e Digna Iglesias, expresaron o seu entusiasmo por este festival, convidando a toda a veciñanza a participar. Desde a Asociación Amicos agradeceuse a colaboración tanto do Concellos, como de JEALSA Rianxeira, unha implicación desde a organización do evento que facilita poder desenvolver todo o programa previsto, un programa “que deixará sorprendidas a todas as persoas asistentes”, sinalaron.
Este ano sumase a colaboración o Grupo Nosa, Actemsa, Orbutrans e a clínica dental, Rebeca Ozores.
