Os obradoiros formativos sobre acoso escolar promovidos polo Instituto de Mediación Educativa de Ribeira (IMER) e a Concellería de Servizos Sociais, Promoción Social, Igualdade e Diversidade do Concello de Ribeira a través do CIM recalan esta semana en sete centros educativos do municipio.
Cómpre lembrar que esta iniciativa, denominada Dereito a saber: obradoiro sobre diversidade, ten como obxectivo ofrecer ferramentas para combater unha problemática existente na nosa sociedade como son os casos de acoso escolar derivados de calquera tipo de discriminación e sinaladamente por razóns de orientación sexual.
A tal efecto, o pasado 26 de outubro houbo un obradoiro didáctico destinado ao profesorado e nestes días estase a celebrar talleres para o alumnado dos diferentes centros de secundaria, bacharelato e FP do termo municipal. Concretamente, onte tivo lugar nos colexios Sagrado Corazón de Castiñeiras e Bayón; hoxe está a celebrarse no IE Número 1, CIFP Coroso e colexio A Milagrosa de Oleiros; e este xoves 10 de novembro terá lugar no IES Leliadoura e no colexio Galaxia.
Os relatores encargados de impartir a formación son expertos pertencentes á Asociación pola Liberdade Afectivo Sexual da Coruña (ALAS).
