Licitado o proxecto para mellorar a accesibilidade o firme na rúa do Carreiro en Aguiño

O Concello de Ribeira vén de licitar as obras para a mellora da accesibilidade e a pavimentación na rúa do Carreiro, situada na parroquia de Aguiño: unha intervención que conta cun orzamento base de 48.311,29 euros e un prazo de execución de tres meses. O obxectivo (segundo consta no proxecto técnico dos servizos municipais) é mellorar a accesibilidade na devandita vía, renovando as beirarrúas para facilitar o tránsito peonil e substituíndo tamén o firme da calzada.

Así, as beirarrúas serán renovadas e ampliadas empregando un pavimento continuo de formigón, en tanto que nos accesos dos viandantes e nas subidas e baixadas colocarase baldosa hidráulica tipo botón. Tamén será mellorado o tráfico rodado estendendo unha nova capa de aglomerado en quente.

As empresas interesadas dispoñen ata o 2 de decembro para presentar as súas ofertas a través do Sistema de Licitación Electrónica da Xunta de Galicia (SILEX).